Australia 2011

So. Iz simer da am Flughafe, warte ufs Check-In. Geit no 7h bis Check-In, 14h Flug bis Dubai, 3h Wartezyt in Dubai, 7h Flug bis Zuerich, 2h Zugfahrt bis Sumiswald u naer bini deheime.

Hie ds Melbourne hei mir’s ues nomau im ne Appartement la guet ga. Mir hei d Stadt erkundet, Australian Football gluegt, ds St. Kilda ar Promenade umegloffe, diversi Pubs abklapperet, gshoppet und im Casino Gaeut verlore (Ussert Aicher… di Moore het gwunne). Es isch e ziemlech intensive Abschluss vo dene Ferie gsi.
Ha vo Melbourne leider grad keni Bilder zur Hang, wirde die aber de sicher no mau online steue. Haebets guet & cu soon. Kobe

hallo zäme

no ei wuche, u mir si wieder daheime (auso zmingscht aicher u ig). i verzeue euch iz aber zersch mau no, was mir i de letschte paar täg so gmacht hei:

nachdäm mir üses super appartment ds warrnambool hei verlah (iz äbe ohni locher und pfiru), si mir mit hans 1 und 2 dür die wunderschöne grampains nach halls gap gfahre. leider isch e grossteil vo däm nationalpark abgsperrt gsi, wäge de überfluetige. aber mir hei glich rächt vieu gseh. ds halls gap (es chlises gmüetleches dörfli ide bärge) hets de für nes letschts mau gheisse: camping.

rolf het, wo mir si acho, afe einisch uuunbedingt üse grossi zäutplache wöue ufsteue, da mir ja schliesslech vieu gäud derfür zahlt hei u mir se ja de später eh nümme chöi bruche. das het es affetheater gä, bis die gstange isch aber am schluss isches guet cho! am abe isch de so richtegi lagerfüür stimmig ufcho. nachdäm mir uf üsem persönleche holzgrill es herrleches barbecue gnosse hei, hets um’s füür ume e gitarre session und e wäuts diskussion über liebi & beziehige gä und: di verfluechte zigarrette si üs usgange u aui läde hei scho zue gha. auso hei mir churzerhand müesse uf snus umrüschte. am morge druf hets de es angers erwache gä: mir hei üsi hamburger brötli vor usse ufem tisch la lige u da si sicher öppe 20 papageie (settigi wie dä ufem foto) gsi u hei um dä “frass” kämpfet. e huere lärme hei di sieche gmacht. i ha se de chönne verjage aber di brötli hei mir müesse wärfe.

u a däm tag isch wieder mau e wanderig ufem plan gstange. dr bärg ds düruf richtig halls gap. es si leider, wiederum wäg de überfluetige, wo im wald teils schade agrichtet hei, nid aui wanderwägli offe gsi. aber bülgen het da glich öppis schöns gfunge, wo mir hei düre chönne (siehe foto). d ussicht dert obe isch uf jede fau sagehaft gsi u dr ufstig het sich glohnt. wieder bim camping platz acho, hei rolf u tinu bereits ikouft gha u de simer ga holz sammle für würscht ob ds tue. simu het de mit schwizer sackmässer wöue e boumstamm zersage, bis e wärte zäutnachbar nümme het chönne zueluege und üs churzerhand e richtegi saagi usglehnt het, ! wo’s idunklet het, u mir wieder voui ränze vom grilliere & fressen hei gha (hotdogs & gemüse-dip vo tinu), si de di 3 tenöre zum isatz cho. tinu, aicher & bülgen hei us mim liederheftli songs gwünscht, wo i uf dr gitarre gspielt ha und sie de herrlech gsangstechnisch performt hei (inkl. solostrophene vo tinu & aicher)! u nach em ne gläsli wy, isch di ganzi aglägeheit no luschtiger worde. rolf het zu däm zytpunkt mit em ne 16 stünder igsetzt. gschlafe vo sächsi am abe bis zähni am morge (fasch ohni ungerbruch).

ah öppis hätti fasch vergässe: uf däm campingplatz si mind 15-20 kangurus eifach so frei umegloffe. isch würkli sehr speziell gsi, di luschtige tierli so nach ds gseh. ei nacht, wo mir no vorusse ghocket si, si sicher öppe 15 stk grad vor üs näbe düre “tonneret”. u aicher het sis neue lieblingstier gfunge!

iz simer wieder ungerwägs, zrügg nach melbourne, wo mir di letschte paar täg de wei verbringe. dr letscht zwüsche stopp mache mir da grad ds ballarat. da simer wieder im ne motel. isch irgendwie di erschti stadt, wo so chli e “gschicht” het u wome d gschicht o gseht. würklech auti, schöni boute. und sie het goldgräber vergangeheit. gloub 1850 si da di erschte gold-suechende itroffe. geschter, wo mir da si acho, hei mir nümme vieu gmacht. si eifach no is irish pub ga ässe. angers fein gsi => guinness pie im irish murphys. yes. bevor mir hei si, hei mir (leider) no e gambling room gfunge, wo jede (ussert tinu) wieder einisch chli gäud verzockt het. guet derfür hani ds canberra im casino bim blackjack 200.- gwunne. isch doch ou öppis hüt gö mir ine grosse park, wo eim di goldgräber vergangeheit vo ballerat söu nächer bringe. bi mau gspannt wie’s wird.

auso, i wünsche euch vieu spass bim schaffe u i mäude mi de öppe no es letschts mau us melbourne.

cheers kobe

Üse Usgangsort für’d Great Ocean Road isch Torquay, ca. e Autostung südlech vo Melbourne, gsi. Mir hei dert zweh nächt ufemne Camping verbracht. Torquay isch bekannt für cooli Outletstores. Billabong, Quicksilver, Reef, Globe, Ripcurl und Roxy für Pfiru. Es wahrs Paradies für die meischte vo üs . Aicher u Kobu heisech uf jedefau angers mit Hüet, Shirts u Jäggli iideckt. Aber o der Räscht hetsech nid grad zrugg ghaute mit poschte.

Am zweite Abe isches de im Dorfpub wieder sehr luschtig zue und her gange. Sogar d’Polizei het recht verwunderet id Gartebeiz g’ öigeret wosi di viele Jugs (Pitcher) uf üsem Tisch gseh het . Einisch meh hetnis dert o am Morge ufem Campingplatz dr Platzhirsch ermahnt… I gloub er isch froh gsi, womer när si ufbroche richtig Apollo Bay.

Ab dem Zitpunkt simer wiedermau so richtegi Touris gsi. Aber äbe, mi isch nid grad au Tag uf der Great Ocean Road. Geng es paar Kilometer fahre u när bi de Lookouts ahhaute u di obligatorische Föteli mache. D’ Strass selber isch recht chillig. Geng chli ufe u abe, kurvig u eifach gmüetlech zum fahre. U mi het natürlech geng di direkti Ussicht uf ds Meer.

Apollo Bay selber isches schöns chlises Dörfli direkt am Meer. Leider hei d’ Temperature nümm grad zum Bade iiglade, aber itze. Fänk und Kobu hei dert de wiedermau im Motel pfuuset. Mir si ufemne sehr chline u gmüetleche Campingplatz mitere Toppchuchi gsi. So heimernis de o grad es sehr feins z’Nacht köchelet. Nudle mit ere sehr scharfe Bolognaise vo Simu und er e sehr feine Carbonara Sauce vo Pfiru.

Am nächste Tag isches de witergange richtig Warrnambool. Ab Apollo Bay führt d’ Strass nümm direkt am Meer entlang. Dr für hets sehr cooli Lookouts. Unger angerem di 12 Apostle…wo gloub nume no 9 ume si. Mi isch sech grad e chli vorcho wie ufem Jungfroujoch. Sicher 9 vo 10 Touriste dert si asiatischer Herkunft gsi. Es “must see” uf ihrne Bustüürli. Nach de 12 Apostle hets no witeri sehr schöni Orte gä. Loch Arch George u London Bridge si auso grad so empfählenswert wi d’ Apostle. Loch Arch George ische Bucht wo komplett i de Felse inne isch. Mit emne chline Sandstrand, wo auerdings Bade verbote u nid grad empfählenswert isch. Ds Meer i dere Bucht isch recht heftig u imposant. D’ London Bridge gsehter ufem Föteli (unge ir Gallery).

Ds Warrnambool heimernis es sehr cools, riesigs Appartement, ds “Ban Kor House” gmietet. Fritig bis Zischti u direkt im Stadtzentrum. Isch auso sehr empfählenswert u günstig. Ds Städtli selber het öppe 10’000 Einwohner u sehr gueti Usgangsmüglechkeite. So heimer am Friti u am Samschti Abe wiedermau so richtig gas gäh. D’ Pubs si vou gsi, Livesound, kener Touriste, eifach hammer . Speziell dr Samschti hei mir de mitem ne luschtige Sauff-Blackjack igstumme. Hei mir ja fasch müesse, wöu’s dr letscht gmeinsam Abe mit Locher & Pfiru gsi isch Guet, sie si de nach däm durchzechte Abe glich no es Tägli lenger zum usspanne da blibe. Dr Sunntig heimer de o di meischti Zit mit schlafe, chopfweh, fernseh luege, etc… verbracht. Haut eifach e Milli-Day . Fank u Kobu hets de am Abe glich scho wieder i Usgang zoge. Si hei es sehr cools Irish – Pub gfunge, wo sech au Sunntig öppe 10 Ire zum Musiziere träffe. So richtig mit Dudusack u auem drum u drah. Kobu het uf jedefau o grad munter mit gittärelet & gsunge . (Anmerkung Kobe: I däm Pub si eifach di geilschte Lüt gsi u Fänk & ig hei üs herrlech amüsiert dert inne). Mir heinis e gmüetleche Abe mit Jasse (Coiffeur) u DVD’s gmacht u so das hammer Weekend la usklinge.

Take care Bülgen

Bilder:

[Show as slideshow]

So i mäude mi mau wieder! Sitem letschte Itrag hei mir ziemlech e Wäg zrügg gleit. Mir si vo Canberra via Eden, Lakes Entrance & Inverloch bis nach Torquay. U vo da us schribeni iz grad. Mir hei ir letschte Zyt geng uf Zaeutplaetz uebernachtet, wos ke Internet het gha. Darum bini nid so zum schribe cho.

D Fahrt vo Canberra zrugg ad Küschte isch super gsi. Eifach e herrlechi Szenerie! Isch zwar no schwierig di schöni Landschaft irgendwie uf Foto ds bringe (u de no usem fahrende Outo). Aber darum bini ja dert, fürs mit eigete Ouge ds gseh

Acho in Eden, u es het afa schiffe. Da hei mir prompt im ne härzige Motel icheckt. 40 Dollar pro Nacht, super Zimmer u ne gheizte Indoor Swimming Pool. Haha, dert hei mir de grad einisch d Sou useglah bis dr Platzhirsch isch cho usrüefe. => WASSERBOOOOMBE. Am Tag druf sie mir ds Eden no churz ad Küschte füre ga e Lüchtturm aluege u dr schön Usblick ga gniesse, när isches witer gange bis Lakes . Schlussändlech si mir i däm Küschtedörfli 3 Nächt blibe. Dr Campingplatz, wo mir deheime si gsi, isch zirka 1 Kilometer vom Mini-Zäntrum entfernt gsi. In Lakes Entrance gits agäblech di beschte Fischgricht vo Oustralie. Und ig aus Fischhasser (liecht übertribe), ha de tatsächlech mau wieder so öppis probiert. UND: Es isch super gsi. Irgendwie het haut eifach o aues passt. Es chlises Restaurant mit Blick ufs Wasser & ufd Fischkutter. E gueti Sach isches gsi.

Dr Houptgrund aber, werum mir 3 Nächt si dert blibe: Mir hei e öffentleche Golfplatz gfunge u hei das unbedingt mau wöue ga usprobiere. Dr Tinu het wöue es Drunken-Golf spiele u het darum 1-2 Bierli meh gha, als die angere, wo mir bi däm Golfplatz si acho. Tatsächlech hei sie üs druf gla u für 23 Dollar isch jede usgrüschtet worde mit Schläger & Bäll. U lueget euch mau uf däm Bild dä wunderbar Usblick ufds Meer a. Es isch geniau gsi. Golfe hei mir zwar nid bsungers guet chönne aber es het angers Spass gmacht. Simu het 1 Ball mit Gwaut überne Strass hinwäg is Nüt drosche, dr Tinu het plötzlech chli d Freud verlore, wo är 2-3 Mau eifach übere Ball gschlage het und dä de öppe nur so 20-30cm vorwärts isch cho Dr Fänk isch öppe no am Erschte e Golfer. Am Tag druf sie mir 2 no einisch gange u dä jung Fankhuser het mi auso fertig gmacht Ds Minigolfturnier wo mir so ds säge aus Usloufe ono gspieut hei, isch de ganz klar a Büdu gange.

Am Abe si mir ids einzige Pub vo Lakes Entrance, wo gemäss dr Taxifahrerin e riese Party hät söue stattfinge. Ds erschte Mau ds Australie hei mir müesse Itritt zahle für ne Band ds lose u prompt isches de o die erschti Band ds Oustralie gsi, wo schlächt gspielt het. Aicher het Songs errate. Di Coversongs si drum würklech teils so schlächt gspielt gsi, dass me fasch bis zum Schluss vom Lied nid sicher isch gsi, vo wäm’s isch! Item, lang blibe si mir de dert nid u si churzum ids Näscht

Ufem Zäutplatz hani iz öppe geng no chli d Gitarre füregno u chli Wunschkonzärt gmacht. De muess öppe geng no e Polo Hofer Song füre Simu gspieut si! Dr Rolf het ds game entdeckt, sit ig ihm es paar Spieli ufs iPhone glade ha, ischer nüm vo däm Biudschirm wäg ds becho. Schlafe, Game, Suffe… so ds säge Natürlech übertribeni da es bitzeli aber es isch uf jede Fau eso, dass di ganz Zyt irgendwo es iPhone zum ufladfe igsteckt isch. U ratet mau wäm sis, dass es meischtens isch…

Eismau am Abe ds Inverloch hets de wieder e Grillade am Meer à la Simu gä. Es isch e angers gmüetlechi Aglägeheit gsi. U Hunger het definitiv de niemer meh gha. Nur Durscht: Bi es paar Gläsli Rotwy hei mir de no e super interessanti Diskussion gstartet, wo vo SCL/SCB Fanrivalität, über Politik links/rächts bis zur Zuekunft vo de Mönsche u vor Ärde gange isch.

Dr Tinu het geschter ds Melbourne sis Outo abgä und iz si mir nur no mit Hans1 und Hans2 ungerwägs. Isch es ziemleches Ungerfange gsi bi 39 Grad im Schatte dür das Verkehrschaos vor Stadt ds fahre! Simu het zwar freud dranne gha Aber so isch haut jede Mönsch angers!

Iz geits de ab ufd Great Ocean Road… Auso i wünsche euch bis zum nächschte Mau e gueti Zyt. Kobe

[Show as slideshow]

Nachdem üs e Indische sehr nätte Maxitaxifahrer is Zäntrum bracht het, simer üs natürlech zersch mau ines irisches Pub ga verpflege. Dr Fänk dä iigfleischt Fäudschlösslitrinker hetsech nach ix Jahre uf frömds Bierterrain begä. Er isch sit nöiem itze megagiga Guinnes Liebhaber. Nach zwöi, drüü Bierli, heimer de der läng Weg zum Parlamentsgebäude unger d’Füess gnoh. Wie’s sich ghört für Sportler, simer die 3 – 4 Kilometer gloffe. Üse Weg het unger dr Mittagssonne vomne riese Kreisu überne Autobahnbrügg gführt. Da mir der Wegwieser zum offizielle Zugang nid gseh hei, simer de über Schliichwägli (Vita – Parcours) zum Houptiigang cho. Dr gröscht Teil vo däm Gebäude isch ungerem Bode, wüeu sis künstlech zumene Hügu ahghärdet hei. Leider het das üse Polier nid mitübercho, u hetsech uf däm Hügu (Gebäude) erliechteret. Ds Gebäud selber isch när nid würkli dr Hammer gsi, aber itze.

Nach dem super kulturelle Usflug simer de retour ids Stadtzentrum. Nach diverse Bierrundine heimer de no di glorriichi Idee gha, hurti is Casino gad’s Geld für die Ferie zrügg ds gwinne. Da mer aui, wisech das i de Summerferie ghört, nume mit Flip – Flops usgrüschtet si gsi simer natürlech nid inecho. Was üs aber nid abghaute het, no chli id Casino – Bar gad’s plodere ud’s philosophiere. Aicher het nach reglecher Diskussion d’Erkenntniss erlangt, das vo itz ah für aues woner macht e Vetrag ungerschribe wird.
Itz fröie mir üs uf das rein schwizerische Viertufinal Roger gäge Stan, wo ire guete Stung wird ahfah.. Itz wärdemer villech üsi Reiseplanig so mache, dass mir am Finautag in Melbourne si zum luege wine Eidgenoss dä Chübelicup gwinnt. Wemer hinech im Casino (mit Schueh) dr Jackpot hole, wärde mir üs de sicher o no Tickets für dä Finau zieh.
Fänk u Bülgen

[Show as slideshow]

Nachdäm mir no e guete Abe ds Wollongong ire Bar mit Live-Musig und e chli zocke ade Spieloutomät verbracht hei, grüesse mir mittlerwile us dr Houptstadt Canberra. D’Aussies säge zwar, dass di Stadt absolut ke Bsuech wärt isch: Künschtlich ufboue, tüür u gar nid schön. Aber mir finge ja ou, we Touris ir Schwiz nur Züri, Luzärn u Gänf gö ga luege, verpasse sie öppis. U zwar ÜSI Houptstadt. Ja und darum het üs niemer chönne dervo abhaute, das Canberra ga adsluege. Iz sie mir da und eigentlich sehr positiv überrascht. Klar mi merkt, dass das e “Planhouptstadt” isch und dass sie no nidemau 100 Jahr aut isch. Aber es gfaut üs da eigentlich rächt guet. Für 2 Nächt chöme mir da im ne Motelzimmer unger.

Di ganze Details vo üsem Canberra Ufenthalt, fouge vo Bülgen & Fänk. (siehe oben). Aber zersch mau hie no die versprochene Fotos vo üsere Blue Mountains Wanderig:



[Show as slideshow]

Tach.
I bi da grad im ne Internet Cafe u ha daenkt, i schribe da hurti churz oeppis. Auso uese Hans1 isch wieder gflickt. Neui Raeder het er uebercho. Isch angers muehsam gsi, e Garage & e guete Mech ds finge. Aber nach 2 halb verlorene Taeg si mir iz wieder on the Road! Dr Abstaecher id Blue Mountains isch scho duere und es isch fuer mi persoenlech es ABSOLUTS Highlight gsi. Di Wanderig duer di Baerge isch eifach nume herrlech gsi. Diraekt vom Zaeutplatz us ds Katoomba si mir losgloffe u hei e Landschaft gseh, wo eim het umghoue. Und: Dert isches zum erschte mau nid so heiss gsi yeah! Es het zwar der Eint oder Anger gae, wo tatsaechlech chaut het uebercho. Dr Tinu het sogar e Chappe agleit haha! Leider chani i daem Momaent grad keni Biudli ufelade aber i wirde das bir naechschte Glaegeheit natuerlech nachehole.

Mittlerwile si mir wieder ar Kueschte. U zwar ds Wollongong (isch chli unger Sydney). U ize geits de Richtig Melbourne. Si no 800km vo da. Dr Bertschy verlaht ues morn richtig Brasilie. Schisst mi chli a, eine vo uesem “Team” ds verluere! Mir hei bis iz allgemein naemlech e super Zyt gha au zaeme. Ues angere blibe in etwa no 3 Wuche. Ds Ziel waeri, via Great Ocean Road, nach Adelaide ds fahre u wieder zrugg bis Melbourne. Aber mau luege… Mir naeme meischtens jede Tag, wiener grad chunnt. Mi muess ja de im Alltag wieder gnue vorus plane.

Bis bald!

Auso. Nachdäm mir no es Nächtli in Port Macquarie verbracht hei, si mir witer i Richtig Süde ufbroche. Ziel: Wandere i de Blue Mountains. D’ Strecki hei mir wöue i 2 Täg zrügg lege. Es wärde aber iz mindestens 3 si. Aber mau vo vore: Ganz zerscht si mir i Billabong Koala & Wildlife Park, wo mir es paar luschtigi Oustralischi Viecher agluegt hei. Zum Teil isches zwar (wie i jedem Zoo) ziemlich truurig gsi, ds gseh wie di Tier i chline Chäfige igsperrt si. Aber derfür hani ds erschte Mau im Läbe e Koala Bär live gseh. Härzigi Tierli Besser aus di verfluechte huere Schlange (wo’s dert leider o het gha). Mir hei de üse erscht Zwüschestopp ds Foster wöue mache, da das am Meer ligt und es paar vo üs no gärn hätte wöue ga dri gumpe. Leider isch dert jede Campingplatz und jedes Motel usbuechet gsi. Mir hei ömu nüt gfunge und üs de spontan entschiede, no chli witer ds fahre.

Witer isches de är Küste entlang über Elisabeth Beach bis Buladelah, wo mir de ändlech es Motel  (für sagehafti 18 Doller pro Nacht) gfunge hei. Das Buladelah wird mir no sehr lang i Erinnerig blibe. Nid wöu dr Ort bsungers schön wär gsi. Aber es isch sehr authentisch und absolut nid touristisch gsi. nur 1000 Iwohner und eis “Houptsträssli” mit 1-2 Läde und eim Pub. U i letschterem hei mir de ou e luschtige Abe verbracht. Es si es paar Rundine übere Tisch und mir hei mind 20-30 Höger id Jukebox ine gla. Klassiker um Klassiker het Aicher sich gwünscht. Reggae Music het natürlech ono chli müesse si. Mi isch dert ou sofort mit es paar Iheimische ids Gspräch cho u mir si dert grad chli e Attraktion gsi. Uf jede Fau het sich jede gfragt, werum mir usgrächnet i ihres Dörfli si ga übernachte. Het mir sehr passt. Der Abe hei mir de im Motel la usklinge mit ere Chischte Bier u ere churze Gitarre Jam-Session, bis mir ganz fründlech vom ne angere Motel-Gast druf higwise si worde, dass mir doch chli söue stiller si, wöu är morn müess schaffe Sogar 2 Iheimischi si no mit is Motel eis cho trinke. Super Sach gsi uf jede Fau!

Hüt wär eigentlich dr ganz Wäg bis Katoomba ufem Programm gstange. Das Dorf isch dr Usgangspunkt für Wanderige ide agäblech wunderschöne Blue Mountains. Mir si losgfahre ids Landesinnere dür herrlechi Landschafte aber no nidemau uf halbem Wäg hett eine vo üsne Van’s (liebevoll genannt Hans 1) dr Geischt ufgä. Gfahre ischer zwar no, aber di luute, komische Grüsch, wo är vo sich gä het, hei üs ziemlech skeptisch gmacht u mir heine sicherheitshauber uf ne Parkplatz gsteut. Nach langer Diskussion hei mir de em Camper-Vermieter aglütte u di hei üs de ä Outo Wärkstatt agä, wo mir ihn si ga zeige. Iiirgendöppis sigi gar nid guet, het dä Mech gseit u mir söui ja nüm witer fahre. Eis vo de Vorderräder wär uf jede Fau fasch abgheit.

Morn am Morge wird Hans 1 de repariert, sprich mir chöi ne id Garage bringe. Darum si mir iz ds Singleton u (no) nid ds Katoomba. Isch e ziemlech asträngendi Telefoniererei mit Wärkstatt und Camper-Vermieter gsi… puhh. Aber aues het Vor- u Nachteile. Dank em Defekt vo Hans 1 hei mir hie ds Singleton es aaaaangers geils Appartment gfunge. Zwar 67 Dollar pro Nacht aber es isch eifach Luxus pur. Riesegross & gmüetlech. Nach däm asträngende Tag genau ds Richtige für chli usdspanne. Iz hocke mir da au vorem TV, luege Roger Federer @ Australian Open und trinke es Glas Rote. Ds Wöschwyb Bertschy isch momentan in voller Aktion und gli hei mir wieder suberi Chleider, yeah! Iz hoffe ig eifach, dass morn dä Hans 1 gflickt wird u mir chöi witerfahre.

Wie Aicher hüt so schön gseit het: Uf nes verschissnigs Erläbnis folgt immer es Guets! U genau so isches üs hüt ergange! Häbit’s guet und bis bald! Kobe

[Show as slideshow]

so, vor öppe 7 täg hei mir surfers paradise verla, nachdäm mir dert no e nacht ufem ne camping platz verbracht hei. d nachrichte im fernseh über di übeschwemmige hei üs aber de sofort derzue bewoge, richtig süde ufdsbräche. brisbane isch nur ca. 30-50km nördlech gsi u das isch komplett überfluetet worde. immerhin hani iz grad im tv gseh, dass es mittlerwile scho besser isch und d’lüt dert langsam aber sicher wieder chöi zrugg ga. vo surfers us richtig süde isch aber de prompt scho e teil vor autobahn gsperrt gsi und mir hei e umwäg durchs landesinnere via casino und grafton müesse mache. dert ds grafton hei mir de ds erschte mau mit eigete ouge gseh, wie krass teils di überschwemmige si. mir si dert aber no grad so düre cho u si de witer nach sawtell. dert hei mir üs uf em ne gmüetleche camping platz nieder gla.

di meischte vo üs si uf jede fau es bitzeli erliechteret gsi, dass mir afe chli witer wäg si cho vo de überschwemmige. dr aicher auerdings het das ganze irgendwie am wenigschte kümmeret. är hets ziemlech locker gno . ä herrlechi grillade hei mir üs de no überta. dr platzhirsch het üs sogar ds liecht bir grillsteu aträit, dass mir am abe no hei chönne di würscht übertue! gnue bier hei mir üs natürlech o ikouft. wurst und bier… iz het nume no dr yb match gfäut.

nach 1 nacht ds sawtell si mir de witer richtig kempsey, crescent head bis point plomber. dr tinu het üs e campingplatz zeigt, wo diräkt am meer gläge isch. sehr schöne ort gsi. aber mir persönlech isches wäg viecher & sunne nid sooo wohl gsi dert. di huere geckos oder warane hei mi am afang angers erchlüpft. riese eidechse wo dert überau umegloffe si. irgendwenn hani mi aber de chli chönne a di viecher gwahne und’s o chli chönne gniesse. houptsach d camper-türe si immer zue gsi. ds meer isch öppe 20-30m vo üsem übernachtigsplätzli entfernt gsi.gueti sach. aber es witers “problem” isch de di hitz gsi dert. niene würklech schatte… u wenn isches o im schatte huere heiss gsi. de meischte het das zwar passt. aicher & tinu, di 2 sunnechinder hei’s angers gnosse. blaser simu het sich’s ou la guet ga. aber dr berschtinger, fänk, büdu und ig hei de dr 20km läng wäg uf üs gno und si nach kempsey ines klimatisierts pub gange am abe hei büdu u bertschy de no e super nuudle gricht häre zoubere! merci. d abe ungerhautig isch meischtens mini gitarre u aichers ukulele gsi. dr höhepunkt allerdings isch üses top-spieu: zettel-am-schädel! ultra hardcore dead core rundine hei mir gspieut. dr tinu zum bispieu het müesse dr gäub power ranger errate. ziemlechi knacknuss gsi!

mittlerwile si mir ds port macquarie. es gmüetleches plätzli, wiederum am meer, wie dr name ja scho seit. öppis zwüsche em ne dorf und ere stadt. ufem wäg vo point plomber da häre hei mir e “panorama-strass” wöue nä es isch aber de ä 30km längi naturstrass gsi im nirgendwo, wo üs ine sackgass gfüehrt het (siehe bild). uf dr angere sitte vo däm fluss, wäre mir bereits am zieu gsi. zum glück isch de dert e chlini outo fähre gfahre, wo mir 3 dollar zahlt hei u de doch no si acho. geschter am abe si mir ire bar gsi, woni ändlech wieder einisch ha es guinness chönne gniesse leider isch ds live-openair-konzärt grad näbe dranne scho usverchouft gsi… aber ize! hie si mir ds vierte höch wieder einisch im ne motel ungercho für 2 nächt. so schön weme wieder einisch cha uspenne, ohni dass eim di gäubi huer am sächsi scho weckt! letscht nacht am 3 hei mir dr wecker gsteut u hei tottenham-manu live gluegt, yes!

auso. hoffentlich liest das hie ou öpper i wirde mi natürlech wieder mäude. aus nächschts hei mir vor, d blue mountains ga ds bewandere. herrlechi landschafte gemäss fotos. mir si sehr gspannt. u ds wätter wott iz ou besser! mir freue üs uf jede fau uf aues wo no chunnt. bis dann. kobe

[Show as slideshow]


ahoi!

mittlerwile si mir nume no zu sächst ungerwägs. fänk, simu, aicher, büdu, bertschy u ig. morn stosst de no dr tinu wieder zu üs. derfür geit de bertschy churzum witer nach brasilie. komplizierti gschicht i weiss. aber es isch e gueti truppe u es macht spass so ds reise.

mir hei no 1-2 super täg ds byron gha. a eim abe het simu wieder vorzüglech kochet. da simer ire rundi ghocket u hei musig gmacht u gsunge. sogar e songwriterin vo sydney isch no zu üs ghocket u het d gitarre uspackt. yeah! vorgeschter hei mir dr letscht tag mit locher, pfiru, tinu und nadia gfiiret. mad u andle si scho vorhär richtig norde gfahre. es isch samschti gsi u het extrem vieu lüt gha im ganze dorf u vor jedem lokal het me müesse astah für ine. hei aber de glich e bar gfunge, wo mir no chli hei chönne si. geschter het üs dr tinu e geile ussichtspunkt bi byron bay zeigt. schau mal:

när hei mir e abstächer nach nimbin gmacht. es herrlechs, ds dürnigs dörfli. di schregschte lüt loufe dert ume e richtegi hippie kommune. aber grad übernachte hei mir dert nid wöue u si de witer nach surfers paradise. chunnt mir vor wie ne mix zwüsche miami und dubai. wolkenkratzer und palmen… hie hei mir ize nach ere wuche camping mau es motel gno. tuet irgendwie guet, mau so richtig im trochene ds si, nachdäm’s i de letschte täg ziemlech hässlech isch gsi dusse. dr wättergott verspricht aber churzum besserig. mau luege wie di wuche wird.

we de dr tinu wieder unger üs isch, wei mir de, eso wie’s usgseht, richtig süde. mir kläre mau no konkret ab, wie’s mit de überschwemmige im norde usgseht. es het scho verdammt vieu wasser da. mir hei o z.b. müsse e brügg überquere, wo dr bach scho liecht isch drüber cho längwilig wirds üs uf jede fau nid. geschter abe hei mir wieder aues gä ire bar mit live sound. super gsi. auso. i mache mau schluss u mäude mi aber sicher churzum wieder. bb

[Show as slideshow]